Ao ‑kwɛ i dɛ‑nʋɛ' mɛ ‑nɩ 'ɩn ‑kwɛ i
19
Nyɔsoa wluɛ Moisɩ ‑pee ka: 2 ‑Ɩn ‑wlu 'de Israɛ -nyʋ ‑wee' ‑pee ka ‑ɩn ‑na: Ao ‑kwɛ i, dɛ‑nʋɛ' ɛ mɛ ‑nɩ 'ɩn ‑kwɛ i, 'mɔ ‑nɩ Nyɔsoa aoa' Kea.3 Ao ‑te' aoa' "bo ke aoa' de 'a ni' due due' ‑wɛe ao 'je 'ma saba wɔn 'je. 'Mɔ ‑nɩ Nyɔsoa aoa' Kea.
4 Ao 'bo 'de ‑kɩɩ ‑gbai" o "bii ɛ, ao 'bo "nma "ni ceɛn ɛ ‑wɛe ao bɔɛ maa 'de ao bɔɛ "juɛi ‑gbɛɛ. 'Mɔ ‑nɩ Nyɔsoa aoa' Kea.
5 ‑Bo aoa jea 'ɩn ke aoa' wlu "kpei ‑sea 'sraa ‑sa a, ao juuɛ 'ɛ ‑sa ka, ka 'ɩn 'jeɛ kpʋn ɛ. 6 Dɛ aoa' ‑saa 'sraa 'ʋn nyʋ a muɛ dia' 'wɩ ‑ɛɛ o ao ‑sa ɛɛ' 'sraa tu ɛ, 'dewlɛ ɛɛ' 'wɩ tbɛ "i ɛ. 'De 'wɩ 'a taan ‑nɛ "kpei ɛ ‑jɛ ‑sia 'emu nyʋ a muɛ "jri po 'a. 7 'Wɩ 'a taan ‑nɛ "kpei ɛ, ‑bo nyɔ ‑di ɛ, ‑mɛ ɛ se i -kwɛ 'de ɛɛ' 'sraa dɛtu se kpʋʋɛ i.
8 Nyɔ -ɔ muɛ dia' ‑kao a muɔ "kpei jia', dɛ dɛ‑nʋɛ' dɛ ‑tea Nyɔsoa 'a ‑te 'a mɛ ɔ blaa 'blʋɔ, nyʋ 'jeɔ 'de ɔɔ' 'cɛ "klu ‑sa o-.
9 ‑Bo ao ceɛn aoa' ‑kle' ɛ ‑mɛ ao se ɛɛ' ‑gbaa' wei ‑wee' ceɛn i, ‑wɛe ‑jɩ wlaa i ɛ ‑ɩn sɩ ‑wee' 'tɛn i. 10 'Kamɔ ‑ɩn se fiinyɛ-a 'ɛ 'jɔ ‑siɛ jai ‑sai' ‑wɛe ‑ɩn se ɩa' ‑jɩ ‑wla 'tɛn i. ‑Ma mui "itaa 'de nɛɛa" i ke nyʋ jia 'de ‑ma 'blʋa 'di ‑pee. 'Mɔ ‑nɩ Nyɔsoa aoa' Kea.
11 Ao 'bo "jrii ɛ, ao 'bo nyʋ 'srɛ i pooɛ, ao 'bo nyʋ sɩ wɔn diiɛ. 12 Ao 'bo 'ma 'nynɩ "i nɩɛ ‑wɛe ao 'bo sɩ ‑tɩ 'a wlu ‑tie" ceɛn, ‑bo aoa sea 'kan nʋɛ, ‑mɛ aoa blaa 'ʋn 'blʋɔ-. 'Mɔ ‑nɩ Nyɔsoa.
13 ‑Ɩn ‑bo ‑ma ‑ponyiɔ "jru i diiɛ ‑wɛe ‑ɩn -boɔ "jri ɛ. ‑Ɩn ‑bo nyɔ -ɔ nʋa ‑ma dbo 'a ‑kei" "kpei "siiɛ mamaʋ 'sʋ ‑sɔn' 'boɛ 'de 'pɩɩɛn. 14 ‑Ɩn se doun" 'a wai ‑cree" i, ‑ɩn se dɛjrɛ' 'de "jri wai" 'a ‑jei" po i ‑wɛe ɛ seɔ bluua i, 'kamɔ ao 'je nʋ ‑wɛe ao 'je 'mɔ Kea wɔn 'je, 'Mɔ ‑nɩ Nyɔsoa.
15 ‑Bo ao mu 'pee 'jea ao bo ‑topin diɛ. ‑Ɩn ‑bo nɩa" i o 'wlʋɛ 'de ‑ɩn ‑bo "wliiɛ‑ jei o 'wlʋɛ -ke, ‑ɩn ‑je ‑ma dedi' 'a 'pee ka ‑cɔɔn'‑ ka. 16 ‑Ɩn -bo ‑ma 'cɛ sɩ "kpei i -tu" ɛ, ‑ɩn ‑bo ‑ma dedi' sɩ ‑bɛɛa' ɔɔ' 'mɛɛa 'jea "kpei blaa. 'Mɔ ‑nɩ Nyɔsoa. 17 ‑Ɩn ‑bo ‑ma dedi' 'ʋn nyɩɛ 'de ‑ʋn pɛe o, 'kaa ‑ɩn -tmʋʋ nɔ ‑wɛe ‑ɩn je ɔɔ' dɛsaʋn nʋ 'de ɔɔ' -tɩ' 'ʋn. 18 Ao 'bo aoa' ‑cɛ" kpan o ‑saa ‑wɛe ao 'bo aoa' 'cɛ 'ɛ ‑tɩ' 'di poɛ, ‑bo ɛ nɩ 'ka a -wɛe -ɩn -je -ma ‑ponyiɔ ɔ' ‑tɩ' kma ka ‑kma ‑ma ‑cɛ" 'ɛ ‑tɩ ɛ. 'Mɔ ‑nɩ Nyɔsoa.
19 Aoa muɛ 'ma kɛ' wɔn 'jea. ‑Ɩn ‑bo "nɔdɩ ‑sea "i ‑kooɔ' ‑tadue pooɛ ɩ 'bo "nynuu‑ 'wlʋɛ. ‑Ɩn ‑bo diiɛ ɛ "kwli 'sɔɔn 'de ‑ɩn o ‑kle pooɛ. ‑Ɩn ‑bo "wliiɛ‑ ‑ɛɛ jee" sea 'ʋn ‑kooɔ' 'ʋn paa.
20 ‑Bo nyɔ jrɔ' ke kʋɔn 'nynɔkpao -ʋ -tea nyɔ jrɔ' 'ɔ -tea', ‑te ‑tadue i ɛ, -bo ʋ se ‑seie ke ʋ se 'flɛ 'ʋn -te ɛ, "ju -nɔ ɔ muɛ "mlɛi -tea', ka ʋʋ nɩa 'sɔɔn ʋʋ se 'e 'mɛɛa je i dɛ‑nʋɛ' mɛ ‑nɩ ʋ nɩɛ kʋɔn ‑o ke. 21 "Ju ‑nɩa 'mʋʋa‑ 'blae ‑gblɔ mɛ ɔ 'e ja ‑wɛe ɛ 'je ɔ ke Kea 'a wlu "kpei ‑sea 'a 'sraa dɛ nʋ 'de -tan 'tan ‑ɛ ‑sɔn nyʋ ke Kea 'a -gbʋʋan "i "juɛi, 22 ɛmɛ 'sraa ‑sai 'jee to 'de Nyɔsoa "juɛi 'de "ju ɔɔ' dɛsaʋn 'a -kwɛa' 'a ‑tɩ' 'ʋn, ‑wɛe ɛ 'je "kpei "wlʋʋɛ.
23 ‑Bo ao pa 'de 'blʋa ‑ɛɛ wlu 'ɩn cɛan ‑tie" 'di ɛ, aoa muɛ croo tu 'a "kwli ‑wee' doa', ao ‑gbʋn 'ɩa 'jɔ ‑nɩa 'e ‑sʋn taan 'di ja ka dɩ ‑sea' i ‑kwɛ nɩa, ao 'bo ɩ diiɛ. 24 Ɛɛ' ‑sʋn -nyiiɛ' ‑nɛ 'di ɛ ɩa 'jɔ ‑wee' "klein -teɛ kpɔ "i -wɛe ɩ 'je Nyɔsoa sɛpodɛ nɩ-. 25 ‑Sʋn ‑mm" ‑nɛɛ aoa muɛ ɩa' 'jɔ dia'. 'Sʋɛ aoa' ‑kle' a muɛ croa' ka ‑cɔɔn'‑ ka-. 'Mɔ ‑nɩ Nyɔsoa aoa' Kea.
26 Ao 'bo nmi ke ɛɛ' nmɔ diɛ. Ao 'bo de ‑siiɛ, ao 'bo jrii- poɛ. 27 Ao 'bo aoa' "mɩɩ 'dewei ceɛn, ao 'bo aoa' ‑fɩn wɛi ceɛn. 28 Ao 'bo wɩɩ‑ poɛ 'de 'kwɛ 'ɛ ‑tɩ' 'ʋn, ‑wɛe ao 'bo dɩ 'crɩɩɛ 'de aopʋ kwii. 'Mɔ ‑nɩ Nyɔsoa.
29 Ao 'bo aoa' "nynuu‑ nynɔkpae' ‑kwlɔ i ‑te ‑nynɔkpae' 'ʋn nʋʋɛ, ‑wɛe ɛ je ʋʋpʋ "ku "kpei ‑sa, 'blʋa ‑wee' a muɛ jɛi" 'jea ‑gblɛɛ ‑wɛe ɛ 'je ‑ci' cɛn.
30 Aoa muɛ saba 'ɩn "nyɩ aopʋ wɔn 'jea' ‑wɛe aoa muɛ 'ma -gbɛɛna' ‑kwɛai 'a ni ‑tea'. 'Mɔ ‑nɩ Nyɔsoa.
31 Ao 'bo nyʋ ‑ke 'mɛʋ a wlua ɛ ke nyʋ ‑a ‑sia de o muɛ, ao 'bo aoa' ‑pʋn" ‑tɩ i -teɛ, aoa muɛ aoa' ‑cɛ" ‑flɛn" kpʋʋa'. 'Mɔ ‑nɩ Nyɔsoa aoa' Kea.
32 ‑Bo ao 'jee ‑kea" "jriɛ ɛ aoa muɛ ‑klu' sɔn 'a ‑wɛe ao 'jeɔ "i 'bɛɛ‑, 'kamɔ aoa' -Kea" 'a ni' ‑tea 'je "jri "kpae po. 'Kamɔ aoa' Kea plea' 'je nɩ ke-. 'Mɔ ‑nɩ Nyɔsoa.
33 ‑Bo duɩ ji 'de aopʋ "bli ‑tea', ao 'boɔ 'ʋn diiɛ. 34 Ao kpʋn ɔ ka aoa kpʋn a aoa' ‑cɛ" ɛ dedi' ɛ. ‑Ma muɔ ɔ' ‑tɩ' kmaa ka ‑ma kma ‑ma ‑cɛ" 'ɛ ‑tɩ' ɛ: Dɛ dɛ‑nʋɛ' ao nɩ 'dʋɩ 'mɛ 'de Esipʋ. 'Mɔ ‑nɩ Nyɔsoa aoa' Kea.